solar-hnuBOHOL. Pipila ka mga sakop sa media sa Bohol gipakita sa mga kadagkoan sa Holy Name University sa lalawigan sa Bohol sa ilang 100KW Solar Power Energy nga gitumbok nilang gamay nga tampo sa pagkunhod sa hulga sa Global warming. (Liz T. Butron)

TAGBILARAN CITY – Mokabat sa 1,100 ka mga bag-ong solar power panels ang makita karon nga gipahimutang sa atup sa Holy Name University (HNU), ang labing unang unibersidad nga mikuha sa naasoyng pasilisad sa probinsiya sa Bohol.

Gibuksan ang HNU 100KW Solar Power Ener­gy nga pasilidad pinaagi sa usa ka simpleng seremonyas niadtong Abril 15, 2016 sa Scanlon Building sa unibersidad.

Ang pasilidad usa ka hiniusang inisyatiba tali sa Holy Name University ug sa kompanyang Orion Group International Incorporated diin makahatag kini og limpyo nga enerhiya ug magpagawas kini og labing menus nga carbon footprints sa kahanginan.

Aduna usab kini gimontar nga control room nga anaa nahimutang sa ikalimang andana sa Scanlon building ng gipanagiya sa mga pari nga sakop sa Society of the Divine Word (SVD).

Ang HNU usab ang labing unang unibersidad nga gi-istalaran gamit ang Thin-film Technology Module kon nipis nga mga Solar Panels nga labing una usab sa tibuok Pilipinas.

Matud ni Engr. Rynor Jamandre, president sa Orion Group Int’l., Inc., nga ang module napamatu-an na ang episyente niini sa pagdakop sa adlaw.

Gibanabanang 4KW ang mamugna sa matag 1KW nga pasilidad nga gikan sa init sa adlaw diin makasapal sa 1/6 nga panginahanglan sa kuryente sa tunghaan.

Dugang sa Orion Group, ang HNU mahimong makatigum og P109,000 nga binuwang bayaron sa kuryente.

Butyag sa presidente sa HNU nga si Fr. Francisco Estepa, SVD, nga ang lakang gamay nga tampo gikan sa SVD Community ngadto sa pagpakunhod sa hulga sa Global warming sa kalibutan. Paningkamutan usab sa tunghaan ang malungtaron nga kaugmaon sa atong kalibutan ug sa katawhang namuyo sa probinsiya.